مشكله ارمل واقعيه

انا ارمل 35سنه اتعرفت علي بنت كويسه جدا علي مواقع التواصل اتكلمنا مع بعض وعرفت ظروفي وحياتي وربي يعلم اني مكدبتش عليها وانا عرفت ظروفها ذي ما هي قالت ليا . بقي فيه بينا قبول في الحديث و للعلم هي انسه ٢٥ سنه. 
وطلبت منها ازورهم انا روحت الاول لوحدي علشان تكون دي الرؤيه الشرعيه ولو فيه قبول اجيب اهلي الزياره الجايه ونتمم الخطوبه وروحت ليهم البيت وفوجئت بوالدها بيسالني هي قالت ليك علي ظروفها. قولت ليه عادي وانا قابل وربي يقدرني واكون ليها السند ان شاء الله. قالي قالت ليك انها اتفصلت من الشغل.

هي مقالتش ليا. بس قولت عادي وكدبت وقولت ايوه يا عمي قالت ومفيش مشكله انا اصلا مش عايزها تشتغل قالي باللفظ كده قالت ليك انفصلت مش شغلها ليه وهي كان شغلها في جهه حكوميه كبير سكت وبصراحه قلقت من الكلام . قولت فيه ايه يا عمي
قالي حصل ظرف ليها في الشغل واتهمت بالسرقه. وبعد تحقيقات النيابه والمحاكم بنتي دخلت السچن سنه بس اووكد ليك انها كانت مظلومه الخير نزل عليا كالص اعقه
ومبقتش عارف اعمل ايه ولا اقول ايه قالي لو البنت مقالتش ليك محروجه او مكسوفه . انا قولت ليك قبل اصلا متطلب ايدها
انا ساعتها سكت ومش عارف اعمل ايه. هو رد عليا وقالي. انت شرفتنا وكانك جيت شربت عندي الشاي عادي ومعاك اسبوع تفكر
لو لسه عايز البنت هات والدك وتعالي ولو غيرت رايك انت بردو ابني. البنت من خلال كلامي معاها فون محترمه وكويسه بس مش عارف افاتح اهلي والا اقول ليهم ايه وخصوصا اني وحيد ليهم والاسبوع فات منه يومين ومكلمتش اهلي ولا عارف اخد قرار
لو ممكن تساعدوني